ᓄᓇᕗᒻᒥ ᑭᒃᑯᓕᒫᑦ ᐅᖃᓕᒫᒐᖃᕐᕕᖏᓐᓂ ᐱᔨᑦᑎᕋᕐᕖᑦ

ᒥᑦᓵᓄᑦ

ᑭᒃᑯᓕᒫᑦ ᐅᖃᓕᒫᒐᖃᕐᕕᖏᑦ ᐱᒻᒪᕆᐅᕗᑦ ᑭᒃᑯᑐᐃᓐᓇᓄᑦ ᐃᓂᒋᔭᐅᕙᒃᖢᑎᒃ ᓇᖕᒥᓂᖅ ᐱᔪᓐᓇᕐᓂᖏᓐᓄᑦ ᐃᑲᔫᑕᐅᕙᒃᖢᓂ ᐊᒻᒪ ᐱᐅᔪᒥᒃ ᐊᓯᔾᔩᔪᓐᓇᖅᖢᓂ ᓄᓇᓕᖕᓂ. ᓄᓇᕗᒻᒥ ᑭᒃᑯᓕᒫᑦ ᐅᖃᓕᒫᒐᖃᕐᕕᖏᓐᓄᑦ ᐱᔨᑦᑎᕋᕐᕖᑦ (NPLS) ᐊᑐᐃᓐᓇᐅᑎᑦᑎᖃᑦᑕᖅᐳᑦ ᐅᖃᓕᒫᒐᕐᓂᒃ, ᐱᓕᕆᔾᔪᑎᓄᑦ ᐃᑲᔪᖅᑐᐃᔾᔪᑎᓂᒃ ᐊᒻᒪ ᐃᓕᓐᓂᐊᕈᑎᒃᓴᓄᑦ ᐊᑐᒐᒃᓴᓂᒃ 11-ᓄᑦ ᓄᓇᓖᑦ ᐅᖃᓕᒫᒐᖃᕐᕕᖏᓐᓄᑦ ᑐᕌᖓᔪᓂᒃ ᑭᒃᑯᓕᒫᑦ ᐅᖃᓕᒫᒐᖃᕐᕕᓕᕆᔾᔪᑎᖓᓄᑦ ᓴᖅᑭᓯᒪᓕᖅᑐᑦ ᐅᔾᔨᕐᓇᖅᓯᑎᒃᑲᓐᓂᕈᒪᓪᓗᒋᑦ. ᐊᔪᕆᖅᓱᐃᔾᔨᖃᑦᑕᖅᐳᒍᑦ ᐊᒻᒪ ᐱᓕᕆᔨᓪᓚᕆᖕᓂᒃ ᖃᐅᔨᒪᓂᖏᓐᓂᒃ ᓄᓇᕗᒻᒥ ᓄᓇᓕᖏᑦ ᐃᑲᔪᕈᒪᓪᓗᒋᑦ ᐱᕕᒃᓴᕆᑎᑕᐅᔪᓂᒃ ᐊᑐᖃᑦᑕᖁᓪᓗᒋᑦ ᑭᒃᑯᓕᒫᑦ ᐅᖃᓕᒫᒐᖃᕐᕕᖏᓐᓄᑦ ᒪᓂᒪᑎᑕᐅᔪᓂᒃ.

ᓄᓇᕗᒻᒥ ᑭᒃᑯᓕᒫᑦ ᐅᖃᓕᒫᒐᖃᕐᕕᖏᑦ ᐊᑦᑕᕐᓇᙱᑉᐳᑦ, ᑐᙵᓇᖅᖢᑎᒃ ᐃᓂᒋᔭᐅᔪᑦ ᑭᒃᑯᑐᐃᓐᓇᑦᑎᐊᓄᑦ ᐅᒃᑯᐃᖓᓪᓗᑎᒃ ᐃᓱᒪᒋᙱᑦᑎᐊᖅᖢᒋᑦ ᑲᑐᔾᔨᖃᑎᒌᖕᓂᖏᑦ, ᑕᐅᑦᑐᖏᑦ, ᐅᒃᐱᕈᓱᖕᓂᖏᑦ, ᐊᕐᓇᐅᓂᖏᑦ/ᐊᖑᑕᐅᓂᖏᑦ, ᐱᐅᒋᓂᖅᓴᖏᑦ, ᓇᑭᙶᕐᓂᖏᑦ ᐅᕝᕙᓘᓐᓃᑦ ᐊᔪᙱᓐᓂᕆᔭᖏᑦ. ᐊᑐᖃᑦᑕᖅᑐᑦ ᐃᑲᔪᖃᑦᑕᖅᐸᕗᑦ ᑐᑭᓯᒋᐊᕈᓐᓇᖁᓪᓗᒋᑦ ᐊᒻᒪ ᐊᑐᕈᓐᓇᕐᓗᑎᒃ ᖃᐅᔨᒪᔭᐅᔪᓂᒃ ᐱᓕᕆᐊᒃᓴᓂᒃ ᓴᖅᑭᑎᑦᑎᔪᓐᓇᖁᓪᓗᒋᑦ ᓇᖕᒥᓂᖅ ᐱᕙᓪᓕᐊᔾᔪᑎᒃᓴᖓᓄᑦ. ᐊᑐᖃᑦᑕᖅᑐᑦ ᑐᑭᓯᒋᐊᕈᑎᒃᓴᖏᓐᓂᒃ ᒪᓂᒪᕝᕕᒋᖃᑦᑕᖅᐸᕗᑦ ᐃᓅᓯᕐᒥᓂᒃ ᐱᕚᓪᓕᖅᑎᑦᑎᒐᓱᐊᖅᑐᓂᒃ ᓄᓇᕗᒻᒥᐅᖑᓪᓗᑎᒃ ᐊᒻᒪ ᓯᓚᕐᔪᐊᕐᒥ ᓄᓇᓕᖕᒥᐅᑕᐅᓪᓗᑎᒃ. ᐱᓇᔪᖃᑦᑕᖅᐳᒍᑦ ᓄᓇᓕᖕᓃᑦᑐᓂᒃ ᐱᓕᕆᐊᒃᓴᓂᒃ ᐋᖅᑭᒃᓱᐃᓇᓱᒃᖢᑕ ᐃᑲᔫᑕᐅᔪᓐᓇᖅᑐᓂᒃ ᐊᕕᒃᑐᖅᓯᒪᓂᕆᔭᑦᑕ ᐃᓅᖃᑎᒌᖏᓐᓄᑦ, ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᐱᖅᑯᓯᑐᖃᒃᑯᑦ ᐃᓅᓯᖃᑦᑎᐊᕈᓐᓇᕐᓗᑎᒃ ᐅᓪᓗᒥᓕᓴᕐᓂᒃ ᖃᐅᔨᒪᔭᒥᓂᒃ ᑐᓴᖅᑎᑦᑎᖃᑦᑕᕐᓗᑎᒃ ᓇᑭᑐᐃᓐᓇᖅ ᓄᓇᕐᔪᐊᕐᒥᙶᖅᑐᓂᒃ ᑭᓯᐊᓂ ᑕᐅᑐᒃᑕᐅᓯᒪᔪᓄᑦ ᐅᑭᐅᖅᑕᖅᑐᒥᐅᑦ ᐃᓱᒪᒋᔭᖏᓐᓄᑦ ᐅᖃᖃᑎᒌᖁᔭᐅᓪᓗᑎᒃ ᐋᔩᖃᑎᒌᒡᓗᑎᒡᓗ ᐱᔭᕆᐊᒃᖠᒃᑲᓐᓂᕈᑕᐅᓪᓗᓂ ᐃᓅᓯᓕᒫᒥ ᐃᓕᓐᓂᐊᕐᓂᐅᔪᒧᑦ ᐊᒻᒪ ᐅᖃᓕᒫᕆᐅᖅᓴᓂᕐᒧᑦ.

ᓄᓇᕗᒻᒥ ᑭᒃᑯᓕᒫᑦ ᐅᖃᓕᒫᒐᖃᕐᕕᖏᑦ ᐊᔾᔨᒌᙱᑦᑐᓂᒃ ᐅᖃᓕᒫᒐᕐᓂᒃ, ᕿᒥᕐᕈᐊᕐᓂᒃ, ᑕᕐᕆᔮᒃᓴᓂᒃ ᐊᓯᖏᓐᓂᒡᓗ ᐱᔨᑦᑎᕋᐅᑎᓂᒃ ᒪᓂᒪᑎᑦᑎᖃᑦᑕᖅᐳᑦ ᐊᑐᖅᑐᐊᖅᑎᓄᑦ. ᐅᑯᐊ ᐊᓯᖏᑦ ᐱᔨᑦᑎᕋᐅᑕᐅᖃᑦᑕᕐᒥᔪᑦ ᓴᓇᕐᕈᑎᓕᕆᓂᕐᒧᑦ ᐱᓕᒻᒪᒃᓴᕐᓂᖅ, ᓄᑕᖅᑲᑦ ᐱᓕᕆᐊᒃᓴᖏᑦ, ᐊᑭᖃᙱᑦᑐᒥ ᐃᑭᐊᖅᑭᕕᒃᑰᕈᑎᒥᒃ ᐊᑐᕈᓐᓇᕐᓂᖅ, ᖃᐅᔨᒋᐊᕐᕕᒃᓴᐃᑦ, ᕿᒥᕐᕈᖃᑦᑕᕐᓂᖅ, ᐅᖃᓕᒫᒐᕐᕕᐅᖃᑎᒥᓂᒃ ᐊᑐᖅᑐᐊᕐᓂᖅ, ᐊᒻᒪ ᐊᕐᕌᒎᑉ ᐃᓚᖓᓂ ᐱᒻᕆᐅᔪᓂᒃ ᖃᓄᐃᓕᐅᖅᑎᑦᑎᓂᖅ ᓄᓇᕗᑦ ᐱᖅᑯᓯᖓ, ᐅᖃᓕᒫᕆᐅᖅᓴᓂᖅ ᐊᒻᒪ ᐃᑲᔫᑎᒋᔪᓐᓇᖅᑕᖏᑦ ᐅᔾᔨᕆᔭᐅᓕᒃᑲᓐᓂᖁᓪᓗᒋᑦ.

NPLS-ᑯᑦ ᐃᑭᐊᖅᑭᕕᒃᑰᕈᑎᖃᕐᒥᔪᑦ http://www.publiclibraries.nu.ca ᓇᑭᑐᐃᓐᓇᖅ ᓄᓇᓕᖕᓂᙶᖅᑐᑦ ᑎᑎᕋᖅᓯᒪᓪᓗᑎᒃ ᐊᒻᒪ ᖃᕆᓴᐅᔭᒃᑯᑦ ᐃᑲᔫᑎᒃᓴᓂᒃ ᐊᒻᒪᓗᑦᑕᐅᖅ ᖃᕆᓴᐅᔭᒃᑯᑦ ᑭᒃᑯᓕᒫᑦ ᐊᑐᕈᓐᓇᖅᑕᖓ ᑎᑎᕋᖅᓯᒪᔪᑦ ᖃᔅᓯᑲᓪᓚᖕᓂᓪᓗ ᓇᖕᒥᓂᖃᖃᑕᐅᔪᑦ ᖃᕆᓴᐅᔭᒃᑯᑦ ᑎᑎᕋᖅᓯᒪᔪᖁᑎᖏᓐᓂᒃ. ᐊᑐᖅᑐᐊᖅᑎᑦ NPLS ᑎᑎᕋᖅᓯᔪᖏᓐᓂᒃ ᐊᑐᕈᒪᔪᑦ ᐅᕗᙵᕐᓗᑎᒃ http://catalogue.publiclibraries.nu.ca ᑕᑯᒋᐊᕈᓐᓇᖅᐳᑦ.